nimi sin

musi Lisi Masan

musi Masan li musi supa.

jan 4 li utala kepeken musi ni tawa ni: ona li wile kama jo e mute pi nanpa pona ni: ona li suli #1.

tawa ni la, jan musi li wile pali e “luka” pona kepeken ijo musi.

musi “Lisi Masan” (Riichi Mahjong) li ante pi musi Masan tan ma Nijon.

ijo musi

musi Lisi Masan la, ijo musi ante 34 li lon. ante wan la, ijo musi 4 sama li lon. ni la, ijo musi 136 li lon.

sinpin pi ijo musi li jo e sitelen. monsi pi ijo musi li jo ala e sitelen. nasin musi la, ona li sama lipu pi musi supa.

poka en anpa en sewi pi ijo musi li jo ala e sitelen. poka ona li suli. sewi en anpa ona li lili.

ijo musi ni li:

• ijo musi nanpa (nimi lili: “nanpa”)

• ijo musi pi kon tawa (nimi lili: “ijo kon” anu “kon”)

• ijo musi pi akesi seli (nimi lili: “akesi seli” anu “akesi”)

ijo musi nanpa ale li jo e nanpa. kulupu 3 pi ijo musi nanpa li lon:

• kulupu pi sitelen Kansi (nimi Nijon: “Mansu” anu “Man” (Manzu))

• kulupu pi sitelen sike (nimi Nijon: “Pinsu” anu “Pin” (Pinzu))

• kulupu pi sitelen pi palisa kasi (nimi Nijon: “Sosu” anu “So” (Sōzu))

kama mute la, jan li toki e kulupu ni kepeken nimi “kule”. nimi mute pi nasin Jaku li pali e ni.

nanpa pi ijo musi nanpa pi kulupu Mansu li sitelen lon ijo musi kepeken sitelen Kansi.

nanpa pi ijo musi nanpa ante li sama ni: mute ijo lon sitelen ona.

ijo musi #1 pi kulupu Sosu li jo e sitelen waso.

ijo pi nanpa 1 en ijo pi nanpa 9 li “ijo pi nanpa pini” (nimi lili: nanpa pini). ijo pi nanpa ante li “ijo lili”.

ijo pi kon tawa ale li jo e sitelen Kansi pi nasin suli.

• nasin Ton (東) li nasin #1, li nasin ni: open pi tenpo suno la, suno li lon nasin ni.

• nasin Nan (南) li nasin #2, li nasin ni: ma Antasika li lon pini ona.

• nasin Sa (西) li nasin #3, li nasin ni: pini pi tenpo suno la, suno li lon nasin ni.

• nasin Pe (北) li nasin #4, li nasin ni: ma Asika li lon pini ona.

ijo pi akesi seli li ijo ni:

• akesi seli walo (nimi Nijon: “Paku” (Haku)) li jo e sitelen ala.

• akesi seli laso (nimi Nijon: “Atu” (Hatsu)) li jo e sitelen Kansi “發” laso.

• akesi seli loje (nimi Nijon: “Sun” (Chun)) li jo e sitelen Kansi “中” loje.

ijo pi kon tawa en ijo pi akesi seli li ijo wawa.

ijo musi li “open” la, sinpin ona li lon sewi. jan ale li ken lukin e sinpin ona.

ijo musi li “len” la, sinpin ona li lon anpa. jan ala li ken lukin e sinpin ona.

ijo musi li “lon luka sina” la, sinpin ona li lon poka ni: sina taso li ken lukin e ona.

nasin pi open musi

jan ale li kama jan musi pi nasin wan. nasin ni li sama nasin pi ijo pi kon tawa. musi mute la, jan musi li pali e ni:

• jan musi wan li kama jo e ijo wan pi kon tawa ale, li tawa e ona lon supa musi lon nasin ni: sinpin ona li lon anpa.

• jan musi wan li tawa nasa e ona lon supa musi tawa ni: jan ala li sona e ni: ijo musi seme li seme?

• jan musi ale wan li kama jo e ijo musi wan, li kama jan musi pi nasin sama nasin pi ijo musi.

• jan musi ale li tawa monsi e ijo musi ona tawa poki pi ijo musi ale.

jan musi li kama tawa supa musi lon nasin ni:

• supa musi li wile jo e poka 4.

• jan musi pi nasin Ton (nimi lili: “jan musi Ton” anu “jan Ton”) li ken wile e ni: ona li lon poka seme?

• jan musi pi nasin Nan (nimi lili: “jan musi Nan” anu “jan Nan”) li tawa poka pi musi supa ni: ona li lon nasin teje tawa jan musi pi nasin Ton.

• jan musi pi nasin Sa (nimi lili: “jan musi Sa” anu “jan Sa”) li tawa poka pi musi supa ni: ona li lon nasin teje tawa jan musi pi nasin Nan.

• jan musi pi nasin Pe (nimi lili: “jan musi Pe” anu “jan Pe”) li tawa poka pi musi supa ni: ona li lon nasin teje tawa jan musi pi nasin Sa.

ale li pona, jan musi li lon ma sama ni:

              jan musi Sa
          +-----------------+
          |                 |
          |                 |
          |                 |
      jan |      supa       | jan
     musi |                 | musi
       Pe |      musi       | Nan
          |                 |
          |                 |
          |                 |
          +-----------------+
             jan musi Ton

jan musi Ton li tawa e ilo sona pi tenpo musi lon poki ona lon nasin ni: poki pi sitelen “Ton” (東) li lon sewi. ona li toki e ni: kulupu pi tenpo musi pi nasin Ton li lon, jan ni li jan musi pi nasin Ton lon tenpo open.

jan ale musi li len e ijo musi ale. ona li tawa nasa e ona ale lon supa musi. ni li tawa ni: jan ale li wile ala sona e ni: ijo musi seme li lon seme?

ni li pini la, jan musi ale wan li wile pali e ni: o pali e “palisa” 2 pi ijo musi 17. ijo musi ale li wile awen lon nasin ni: sinpin ona li lon anpa. (poka pi ijo musi wan li wile “pilin” e poka ante pi ijo musi ante.) o tawa e “palisa” wan tawa sewi pi “palisa” ante. jan ale li pini e ni la, sinpin li lon.

 .-.-.-.-.-.-.-.-.-.-.-.-.-.-.-.-.-.
 |_|_|_|_|_|_|_|_|_|_|_|_|_|_|_|_|_|
 |_|_|_|_|_|_|_|_|_|_|_|_|_|_|_|_|_|

(sitelen pi poka wan pi sinpin musi)

sinpin pini li wile lukin sama sitelen selo pi palisa 4 (nimi pi pu ala: “leko”).

jan musi Ton li tawa wawa e ilo pi nanpa nasa pi poka 6 tu. poka sewi ona li pana e nanpa. ona li toki e ni: sinpin li open lon poka seme?

jan musi Ton li tawa wawa e ilo pi nanpa nasa tu lon tenpo sin. poka sewi ona li pana e nanpa. ona li toki e ni: sinpin li pakala lon ma seme? o nanpa tan nasin teje pi jan musi ni tawa nasin soto ona.

            1 1 1
            2 1 0 9 8 7 6 5 4 3 2  
            | | | | | | | | | | |
            V V V V V V V V V V V
  .-.-.-.-.-.-.-.-.-.-.-.-.-.-.-.-.-.
  |_|_|_|_|_|_|_|_|_|_|_|_|_|_|_|_|_|
  |_|_|_|_|_|_|_|_|_|_|_|_|_|_|_|_|_|
 (nasin soto)             (nasin teje)
           (jan musi)

jan musi Ton li kama jo e ijo musi 4 (supa 2 pi ijo 2) tan nasin soto pi ma ni.

 ilo pi nanpa nasa li pana e nanpa "6".

             o kama jo e ijo musi ni.
         \______________________/
                       |     
 .-.-.-.-.-.-.-.-.-. .-.-. .-.-.-.-.-.-.
 |_|_|_|_|_|_|_|_|_| |_|_| |_|_|_|_|_|_|
 |_|_|_|_|_|_|_|_|_| |_|_| |_|_|_|_|_|_|

jan musi Nan en jan musi Sa en jan musi Pe li pali e ijo sama.

          (#4)  (#3)  (#2)  (#1)
         j. Pe j. Sa j.Nan j.Ton
         _____ _____ _____ _____
 .-.-.-. .-.-. .-.-. .-.-. .-.-. .-.-.-.-.-.-.
 |_|_|_| |_|_| |_|_| |_|_| |_|_| |_|_|_|_|_|_|
 |_|_|_| |_|_| |_|_| |_|_| |_|_| |_|_|_|_|_|_|

poka ni li jo e ijo musi 2 taso la, o kama jo e ijo musi 2 tan ona, e ijo musi 2 ante tan nasin teje pi poka sinpin lon nasin soto.

sina lukin e supa musi tan sewi la, nasin pi ijo musi li sama nasin palisa pi ilo tenpo sike. (taso, nasin pi jan musi li ante monsi.)

   |||||||||||||||||
  =                 -
  =  .-------> --.  =
  =  | jan musi  |  =
  =     li kama  |  =
  =  ^ jo e ijo  V  =
  =  | musi lon     =
  =  | nasin ni. |  =
  =  `-- <-------'  =
  -                 =
   |||||||||||||||||

jan musi ale li pali e ijo sama, kepeken nasin nanpa sama, lon tenpo tu.

ni li pini la, jan musi ale li kama jo e ijo musi wan tan sinpin kepeken nasin nanpa sama.

nasin ante tan ma ni: sinpin li open pakala lon ma ni la, ijo musi 14 li weka tan sinpin, li kama “sinpin moli”.

 sinpin moli

 ijo musi lukin pi wawa Tola (sewi #3)
              |
              V
open     .-.-.-.-.-.-.-.
 ------->|_|_|_|_|_|_|_| pini
(sewi #1)|_|_|_|_|_|_|_|<-------- (anpa #7)

ijo musi sewi #3 pi sinpin moli li kama ijo musi lukin pi wawa Tola. o ante nasin e ona tawa ni: sinpin ona li lon sewi. ona li toki e ni: ijo musi ale pi nanpa kama, anu ijo musi pi sitelen kama, li ijo musi pi wawa Tola. jan li kama pona la, ijo pi wawa Tola li lon luka ona la, ona li kama jo e nanpa pona suli sin. (o kama sona e wawa Tola lon wan kama.)

ni li pini la, musi li open.

luka pona li seme?

jan ale li musi la, ona li wile jo e “luka pona”. ijo musi 14 ona li wile pona tawa nasin tu ni:

• ona li jo e kulupu 4, e kulupu lili 1.

• ona li pona tawa nasin Jaku wan anu nasin Jaku mute.

“kulupu” li seme?

kulupu ni pi ijo musi li lon:

• “kulupu nasin” li jo e ijo musi 3 pi kule sama, pi nanpa poka.

• • ijo musi “Mansu 4” en “Mansu 5” en “Mansu 6” li kulupu nasin.
• • sina ken pali e kulupu nasin kepeken ijo nanpa taso.

• “kulupu sama” li jo e ijo musi 3 sama.

• “kulupu suli” (nimi ante: “kulupu Kan”) li jo e ijo musi 4 sama.

luka pona li wile e kulupu 4. kulupu nasin en kulupu sama en kulupu suli li kulupu.

• “kulupu lili” li jo e ijo musi 2 sama.

jan li toki e “kulupu” la, ona li toki ala e “kulupu lili”.

luka pona li wile e kulupu lili 1.

nasin Jaku li seme?

nasin Jaku li nasin ni: ijo musi ale sina li pona tawa ona la, sina ken kama pona. nasin Jaku mute li lon.

o sona e nasin Jaku pi pali kiwen ala ni:

• “ijo lili taso”. o jo ala e ijo pi nanpa pini (nanpa 1 en nanpa 9), e ijo akesi, e ijo kon.

• “nasin Jakupa”. o jo e kulupu pi ijo musi ni:

• • ijo akesi.
• • ijo kon ni: sina jan musi pi nasin sama.
• • ijo kon ni: tenpo musi pi nasin sama li lon.

• “nasin sama 2”. o jo e kulupu nasin 2 pi ijo sama.

tenpo musi

musi li open la, tenpo musi #1 pi nasin Ton li lon.

musi pi mute suli li jo e tenpo musi 8. ona li jo e tenpo musi 4 pi nasin Ton, e tenpo musi 4 pi nasin Nan. musi pi tenpo ni li jo e nimi “Ansan” (nimi Nijon: “Hanchan”, 半荘).

musi li ken jo e tenpo musi 4 taso. ni li lon la, ona li jo e tenpo musi 4 pi nasin Ton taso. musi pi tenpo ni li “musi pi nasin Ton taso”, li jo e nimi “Tonpusen” (nimi Nijon: “Tonpuusen”, 東風戦).

ni li ken: tenpo musi 8 li pini. taso, nasin musi li toki e ni: musi li pini ala. ni li lon la, tenpo musi pi nasin Sa li lon.

o sona e ni: tenpo musi ale la, jan musi Ton li jan musi #1.

mani musi en nanpa pona

open musi la, jan ale li kama jo e mute sama pi nanpa musi.

musi pi mute suli la, jan ale li kama jo e mani musi 25000, taso musi ante la, ona li ken jo e mute ante.

jan wan li kama jo e luka pona tan sinpin la, ona li kama jo e mani musi tan jan ale.

jan wan anu jan mute li kama jo e luka pona tawa ijo weka pi jan ante la, ona li kama jo e mani musi tan jan ni.

jan musi Ton li jo e luka pona la, ona li kama jo e mani musi pi mute suli. taso, ona li wile pana e mani musi la, ona li pana e mute suli ona.

jan li pana e mani musi tawa jan ante la, mute ona li kama tan nanpa pona suli (nimi Nijon: “An” / “Han”, 飜), tan nanpa pona lili (nimi Nijon: “Pu” / “Fu”, 符).

nasin Jaku en ijo musi pi wawa Tola li pana e nanpa pona suli.

kulupu en kulupu suli li pana e nanpa pona lili. kulupu pi ijo suli li pana e nanpa pona mute. kulupu len pi pana e nanpa pona mute. ijo ante li pana e nanpa pona lili. lipu ni li toki e ni lon wan kama.

nasin musi

jan musi Ton li jan musi #1. jan musi Nan li jan musi #2. jan musi Sa li jan musi #3. jan musi Pe li jan musi #4.

open la, tenpo tawa pi jan musi Ton li lon. ona li ante lon nasin nanpa. tenpo tawa pi jan musi Pe li pini la, tenpo tawa pi jan musi Ton li open.

tenpo tawa pi jan musi la, ona li pali e ni.

1. ona li kama jo e ijo musi wan tan sinpin.

2. ona li jo e ijo musi 14. ijo musi ni li “luka” ona.

3. luka li pona la, ona li ken toki e ni: “luka mi li pona” (nimi Nijon: “Tumo” / “Tsumo”, ツモ ). ona li pali e ni la, tenpo musi li pini.

4. jan li jo e kulupu suli lon luka ona la, ona li ken toki e nimi “Kan” (nimi Nijon: “Kan”, カン) (lipu ni li toki e nasin pi toki “Kan” lon wan kama.)

5. luka li pona ala la, anu ona li wile ala ona li wile ala pali e ni la, ona li weka e ijo musi wan. (nasin ante li ken. lipu ni li toki e ona lon wan kama.)

jan li weka e ijo musi la, jan ante li pana e ona tawa ma pi ijo weka ona lon supa musi lon nasin pi ijo musi open. jan ale li ken lukin e ijo weka pi jan musi.

jan ante ale li ken pali e ni: ijo weka en luka ona li pali e luka pona la, ona li ken toki e ni: “pona tan ijo sina” (nimi Nijon: “Lon” / “Ron”, ロン). ona li pali e ni la, tenpo musi li pini. jan mute li ken toki “pona tan ijo sina” lon tenpo sama.

jan musi li ken kama jo e ijo weka lon nasin ni.

• jan ante ale li ken pali e ni: ijo weka en ijo pi luka ona li pali e kulupu suli la, ona li ken toki e nimi “Kan” (nimi Nijon: “Kan”, カン).

• jan ante ale li ken pali e ni: ijo weka en ijo pi luka ona li pali e kulupu sama la, ona li ken toki e nimi “Pon” (nimi Nijon: “Pon”, ポン).

• jan pi tenpo tawa kama wan li ken pali e ni: ijo weka en ijo lon luka ona li pali e nasin la, ona li ken toki e nimi “Si” (nimi Nijon: “Chii”, チー).

ona li pali e ni la , ona li kama jo e ijo weka, li tawa e ona, e ijo ante pi kulupu ni ni tawa poka pi luka ona. ona li ante e nasin pi ijo weka: ona li lon poka sama pi jan ni: ona li weka e ijo musi ni.

    toki       toki
  "Si","Pon"   "Kan"
  ___.--.--.   ___.--.--.--.
 |   |  |  |  |   |  |  |  | jan pi poka soto li weka e ijo musi ni.
 |___|__|__|  |___|__|__|__|

 .--.___.--.  .--.___.--.--.
 |  |   |  |  |  |   |  |  | jan pi poka sinpin li weka e ijo musi ni.
 |__|___|__|  |__|___|__|__|

 .--.--.___   .--.--.--.___ 
 |  |  |   |  |  |  |  |   | jan pi poka teje li weka e ijo musi ni.
 |__|__|___|  |__|__|__|___|

toki li toki “Kan” la, ni li lon:

• jan musi li wile kama jo e ijo musi wan sin. ona li kama e ona tan open pi sinpin moli.

• luka ona li pona la, jan li ken toki e “luka mi li pona”. ona li pali e ni la, tenpo musi li pini.

• tenpo musi li pini ala la, ijo musi pini pi sinpin li tawa pini pi sinpin moli.

• ijo musi lukin pi wawa Tola sin li open lon sinpin moli, lon poka pini pi ijo ijo musi lukin pi wawa Tola pi tenpo pini.

sin la, jan li ken toki e nimi “Kan” tan luka ona taso (ni li lon la, kulupu suli ona li “kulupu suli len”). luka ona li len la, luka ona li kama open ala. ni li lon, ijo musi tu pi kulupu suli ona li kama open. ijo tu ante li kama len.

ijo musi ni li open, li ante nasin tawa ni: sewi pi sinpin ona li lon poka pi sewi ona. ona li ken ala weka e ijo musi ni, li ken ala ante e kulupu ni. luka ona li “luka open”.

tenpo tawa ona li lon. ona li wile weka e ijo musi wan.

jan ala li kama jo e ijo musi weka la, tenpo tawa pi nanpa kama li lon.

luka open en luka len

jan musi li kama ala jo e ijo musi tan jan musi ante la, luka ona li len. ante la, ona li open. luka open li pona lili. luka len li pona suli. ni li tan ni:

• nasin Jaku ni li lon: ona li pali ala tawa luka open.

• nasin Jaku ni li lon: ona li pana e nanpa pona suli pi mute suli tawa luka len. ona li pana e nanpa pona suli pi mute lili tawa luka open.

• jan pi luka open li ken ala toki “Lisi”.

kama Tenpa en toki “Lisi”

jan musi li ken jo e luka ni: luka li ken kama pona kepeken ijo musi wan ante taso. ni li lon la, luka ona li jo e kama Tenpa (nimi Nijon: “Tenpai”, テンパイ).

kama Tenpa li lukin ala e ni: ijo musi seme li ken ala kama tawa luka?

luka ni li len la, jan li weka e ijo musi la, ona li ken toki “Lisi” (nimi Nijon: “Riichi”, リイチ). ona li pali e ni la, ni li lon:

• ona li pana e mani musi 1000 tawa supa musi. ona li jo ala e mani musi 1000 la, ona li ken ala toki “Lisi”.

• ona li ante nasin pi ijo weka lon ni: sewi pi sinpin ona li lon poka pi sewi ona.

jan li toki “Lisi” la, ona li pona tawa nasin Jaku “Lisi”, li kama jo e nanpa pona suli 1. taso, ona li ken ala ante e “ijo pona ken” pi luka ona:

• luka pi jan musi li ken kama pona kepeken ijo musi wan la, ijo musi ni li “ijo pona ken” pi jan musi ni.

• ona li ken ala toki “Si”, li ken ala toki “Pon”.

• ona li ken toki “Kan” tawa kulupu suli len taso. taso, kulupu suli len li pakala e kulupu ante pi luka ona la, ona li ken ala toki “Kan”.

• ona li ken toki “pona tan ijo sina” awen, li ken toki “luka mi li pona” awen.

nasin Jaku

jan li wile kama jo e luka pona la, ona li wile pona tawa nasin Jaku. nasin Jaku mute li lon. luka pona li ken pona tawa nasin Jaku wan anu nasin Jaku mute.

nasin Jaku li pana e nanpa pona suli tawa luka pona.

nasin Jaku ni li lon:

• kama Tumo pi luka len (n.p.s. 1). o jo e luka len. ijo pona li kama tan sinpin (ona li kama ala tan ijo weka pi jan ante).

• kama Lisi (n.p.s. 1). o toki “Lisi”.

• • kama Lisi, sike 1 (n.p.s. 1). ijo pona li kama lon tenpo ni: sina toki “Lisi”. sina weka e ijo musi. jan ante li toki ala e nimi “Si”, e nimi “Pon”, e nimi “Kan”. sina weka ala e ijo musi ante lon tenpo ni.

• nanpa pona lili ala (n.p.s. 1). luka sina li len, li jo e mute lili ken #1 pi nanpa pona lili. / sina jo ala e kulupu sama, e kulupu suli. ijo pona ken tu ante li lon tan ni: kulupu nasin wan sina li pini ala. ijo tu ante li ken pini e ona. kulupu lili sina li jo ala e ijo akesi, e ijo kon pi nasin sina, e ijo kon pi nasin tenpo.

• nasin 2 sama (n.p.s. 1). luka sina li len. sina jo e kulupu nasin 2 ni: ijo musi ona li sama.

• pona tan pini sinpin (n.p.s. 1). ijo 1 li lon sinpin. sina kama jo e ijo musi tan sinpin. luka ona li pona tan ijo ni.

• pona tan pini sinpin pi jan ante (n.p.s. 1). ijo 1 li lon sinpin. jan ante li kama jo e ijo musi tan sinpin. ona li weka e ijo musi. luka sina li pona tan ijo ni.

• pona tan sinpin moli (n.p.s. 1). sina toki e nimi “Kan”. sina kama jo e ijo musi tan sinpin moli. luka sina li pona tan ijo ni.

• pona tan toki Kan / pona tan kulupu suli (n.p.s. 1). jan ante li toki e nimi “Kan” tawa ni: ona li wile kama jo e ijo musi. taso, luka sina li pona tan ijo ni.

• ijo lili taso (n.p.s. 1). luka sina li jo ala e ijo nanpa pi nanpa pini (nanpa 1 en nanpa 9), li jo ala e ijo wawa.

• kama Jakupa (n.p.s. 1). luka sina li jo e kulupu sama anu kulupu suli pi ijo musi ni:

• • ijo akesi
• • ijo kon pi nasin sina
• • ijo kon pi nasin tenpo

nasin sina li sama nasin tenpo la, sina kama jo e nanpa pona suli 2.

• kama Lisi tu (n.p.s. 2). tenpo musi li open. sina kama jo e ijo musi. luka sina li jo e kama Tenpa. sina toki “Lisi”.

• ijo suli lon kulupu ale (n.p.s. 1, n.p.s. 2 lon luka len). kulupu ale lon luka sina li jo e ijo musi suli.

• nasin 3 pi kule ante (n.p.s. 1, n.p.s. 2 lon luka len). sina jo e kulupu nasin 3 ni: nanpa pi ijo musi li sama. taso, kulupu wan li jo e ijo Mansu, kulupu wan li jo e ijo Pinsu, kulupu wan li jo e ijo Sosu.

• nasin pi nanpa ale (n.p.s. 1, n.p.s. 2 lon luka len). sina jo e kulupu nasin 3 ni: ona ale li jo e kule sama. kulupu wan li jo e ijo pi nanpa 1,2,3. kulupu wan li jo e ijo pi nanpa 4,5,6. kulupu wan li jo e ijo pi nanpa 7,8,9.

• kulupu sama taso (n.p.s. 2). sina jo ala e kulupu nasin. sina jo e kulupu sama, e kulupu suli taso.

• kulupu 3 len (n.p.s. 2). sina jo e kulupu sama len 3. taso, ijo pona li pini e kulupu sama la, ona li len ala tawa nasin ni.

• kulupu 3 pi kule ante (n.p.s. 2). sina jo e kulupu sama 3 ni: nanpa pi ijo musi li sama. taso, kulupu wan li jo e ijo Mansu, kulupu wan li jo e ijo Pinsu, kulupu wan li jo e ijo Sosu.

• kulupu suli 3 (n.p.s. 2). sina jo e kulupu suli 3.

• kulupu lili 7 (n.p.s. 2). nasin Jaku ni li suli tan ni: ona li wile ala e ni: luka sina li jo e kulupu 4, e kulupu lili wan. o jo e kulupu lili 7 pi ijo musi ante. (sina jo e kulupu pi ijo musi sama 4 la, ni li ike tawa nasin ni.)

• ijo suli taso (n.p.s. 2). ijo ale lon luka sina li ijo suli.

• akesi lili 3 (n.p.s. 2). sina jo e kulupu sama 2 pi ijo akesi, e kulupu lili pi ijo akesi.

• kule wan en ijo wawa (n.p.s. 2, n.p.s. 3 lon luka len). luka sina li jo e ijo nanpa pi kule wan taso, e ijo wawa.

• nanpa pini lon kulupu ale (n.p.s. 2, n.p.s. 3 lon luka len). luka sina li jo e ijo nanpa pi nanpa 1 anu nanpa 9 lon kulupu ale.

• nasin 2 sama 2 (n.p.s. 3). luka sina li len. sina jo e kulupu nasin 2 pi ijo musi sama, e kulupu nasin 2 ante pi ijo musi sama ante.

• kule wan taso (n.p.s. 5, n.p.s. 6 lon luka len). luka sina li jo e ijo nanpa taso pi kule wan taso.

• ijo suli weka taso (suli Mankan). sinpin li jo e ala. luka sina li pona ala. sina weka e ijo suli taso. jan ala li kama jo e ijo weka sina.

nasin Jaku pi suli Jakuman

luka sina li pona tawa nasin Jaku ni la, sina kama jo e suli Jakuman.

• kama Jakuman tan nanpa pona suli. luka sina li jo e nanpa pona suli ni: ona li sama anu suli tawa 13.

• ijo suli ante 13. nasin Jaku ni li suli tan ni: ona li wile ala e ni: luka sina li jo e kulupu 4, e kulupu lili wan. o jo e ijo ni ale:

• ijo Mansu pi nanpa 1
• ijo Mansu pi nanpa 9
• ijo Pinsu pi nanpa 1
• ijo Pinsu pi nanpa 9
• ijo Sosu pi nanpa 1
• ijo Sosu pi nanpa 9
• akesi walo
• akesi loje
• akesi laso
• kon pi nasin Ton
• kon pi nasin Nan
• kon pi nasin Sa
• kon pi nasin Pe
• ijo wan ante ni: ona li sama ijo wan pi luka sina.

• • ni li ken: sina jo e ijo suli ante 13. ijo musi 13 li pona tawa luka sina. ni li lon la, luka sina li jo e suli Jakuman 2.

• kulupu len 4. sina jo e kulupu sama len 4. taso, ijo pona li pini e kulupu sama la, ona li len ala tawa nasin ni.

• • ni li ken: sina jo e kulupu sama len 4. ijo pona sina li pini e kulupu lili. ni li lon la, luka sina li jo e suli Jakuman 2.

• akesi suli 3. sina jo e kulupu sama 3 pi ijo akesi.

• kon lili 4. sina jo e kulupu sama 3 pi ijo kon, e kulupu lili pi ijo kon ante.

• kon suli 4. sina jo e kulupu sama 4 pi ijo kon.

• akesi en kon taso. sina jo e ijo akesi, e ijo kon taso.

• nanpa pini taso. sina jo e ijo musi pi nanpa 1, e ijo musi pi nanpa 9 taso.

• kule laso taso. sina jo e ijo musi ni taso:

• ijo Sosu 2
• ijo Sosu 3
• ijo Sosu 4
• ijo Sosu 6
• ijo Sosu 8
• ijo akesi laso

nasin sitelen mute pi ijo musi pi musi Masan la, ijo musi ni li jo e kule laso taso lon sinpin ona.

• lupa suli 9. luka sina li jo e ijo nanpa pi kule wan taso. nanpa ona li ni:

• ijo 3 pi nanpa 1
• ijo 1 pi nanpa 2
• ijo 1 pi nanpa 3
• ijo 1 pi nanpa 4
• ijo 1 pi nanpa 5
• ijo 1 pi nanpa 6
• ijo 1 pi nanpa 7
• ijo 1 pi nanpa 8
• ijo 3 pi nanpa 9
• ijo nanpa pi kule sama

• • ni li ken: sina jo e ijo nanpa 13. ijo 9 ante li pona tawa luka sina. ni li lon la, nasin mute la, luka sina li jo e suli Jakuman 2.

• kulupu suli 4. o jo e kulupu suli 4 lon luka sina.

• pona sewi. sina jan musi Ton. tenpo musi li open. sina kama jo e ijo musi 14 sina. ijo musi ni li pali e luka pona.

• pona ma. sina jan musi Ton ala. tenpo musi li open. sina kama jo e ijo musi 13 sina. jan ante li kama jo, li weka e ijo ona. sina kama jo e ijo musi sina lon tenpo #1. ijo musi li li pali e luka pona.

• pona jan. (nasin musi mute la, nasin Jaku ni li lon ala.) tenpo musi li open. sina kama jo e ijo musi 13 sina. jan ante li kama jo, li weka e ijo ona. ijo musi weka li pona tawa luka sina. sina toki e nimi “pona tan ijo sina”.

nasin pi nanpa pona

luka li pona la, jan musi li nanpa e ni: ona li jo e nanpa pona suli pi mute seme? ona li jo e nanpa pona lili pi mute seme?

nanpa pona suli li kama tan nasin Jaku, tan wawa Tola.

nasin Jaku li pona tawa luka la, ona li pana e nanpa pona suli tawa ona.

luka li jo e ijo pi wawa Tola, nanpa pona suli pi mute sama li pana tawa ona.

wawa Tola

sinpin moli la, ijo musi open li “ijo musi lukin pi wawa Tola”. ona li toki e ni: ijo seme li jo e wawa Tola?

taso, ona li pali lon nasin ni: ijo musi lukin li jo e ijo nanpa, ijo pi nanpa kama wan li kama jo e wawa Tola.

(ijo lukin li jo e ijo Mansu pi nanpa 4 la, ijo Mansu pi nanpa 5 li jo e wawa Tola.)

ijo lukin li jo e ijo pi nanpa 9 la, ijo pi nanpa 1 pi kule kama li jo e wawa Tola.

• ijo lukin li ijo akesi walo la, ijo akesi laso li jo e wawa Tola.
• ijo lukin li ijo akesi laso la, ijo akesi loje li jo e wawa Tola.
• ijo lukin li ijo akesi loje la, ijo akesi walo li jo e wawa Tola.

sina ken awen e sona ni lon nasin ni: lipu pi nimi ale pi toki pona la, nimi “laso” li lon open tawa nimi “loje”. nimi “loje” li lon open tawa nimi “walo”. nasin ona li ni: laso -> loje -> walo.

ijo lukin li ijo kon la, ijo kon kama li jo e wawa Tola.

• ijo lukin li ijo kon Ton la, ijo kon Nan li jo e wawa Tola.
• ijo lukin li ijo kon Nan la, ijo kon Sa li jo e wawa Tola.
• ijo lukin li ijo kon Sa la, ijo kon Pe li jo e wawa Tola.
• ijo lukin li ijo kon Pe la, ijo kon Ton li jo e wawa Tola.

luka pona li jo e ijo mute pi wawa Tola la, ona li jo e mute sama pi nanpa pona suli.

nanpa pona lili

nanpa pona lili li kama tan ijo mute.

luka pona li len, li kama jo e ijo pona tawa jan ante la, ona li jo e n.p.l. 30.

luka pona li jo e nasin Jaku “kulupu lili 7” la, ona li jo e n.p.l. 25. (ona li kama jo ala e nanpa pona sin tan anpa pi lipu ni.)

kama ante la, ona li jo e n.p.l. 20.

luka pona li jo e kulupu sama, e kulupu suli la, ona li kama jo e nanpa pona lili sin.

• kulupu sama open pi ijo lili li pana e n.p.l. 2.
• kulupu sama open pi ijo suli li pana e n.p.l. 4.
• kulupu sama len pi ijo lili li pana e n.p.l. 4.

• kulupu sama len pi ijo suli li pana e n.p.l. 8.

• kulupu suli open pi ijo lili li pana e n.p.l. 8.

• kulupu suli open pi ijo suli li pana e n.p.l. 16.
• kulupu suli len pi ijo lili li pana e n.p.l. 16.
• kulupu suli len pi ijo suli li pana e n.p.l. 32.

kulupu lili pi luka pona li jo e ijo akesi anu ijo kon pi nasin sama jan anu ijo kon pi nasin sama tenpo la, ona li pana e n.p.l. 2.

ona li jo e ijo kon pi nasin jan la, nasin jan li sama nasin tenpo la, nasin mute la, ona li pana e n.p.l. 4.

nanpa pona lili ni li kama tan ijo pona ken pi luka pona.

ijo pona ken li lon insa pi kulupu nasin la, ni li pana e n.p.l. 2.

ijo pona ken li lon poka pi kulupu nasin la, poka wan taso li lon la, nu li pana e n.p.l. 2.

ijo pi nanpa 8 en 9 pi kule sama li ken pana e kulupu nasin tan poka wan taso tan ni: ijo pi nanpa 7 li lon. ijo pi nanpa 10 li lon ala. ni li sama tawa ijo pi nanpa 1 en 2.

kama Tumo li lon (luka li kama pona tan sinpin) la, ni li pana e n.p.l. 2.

luka pona li open, li jo e nanpa pona lili 20 taso la, ona li jo e n.p.l. 30.

ni li pini la, mute pi nanpa pona lili li suli tawa kulupu poka pi nanpa 10.

n.p.l. 20 li awen n.p.l. 20. n.p.l. 21,22,23…29 li kama n.p.l. 30. n.p.l. 30 li awen n.p.l. 30. n.p.l. 21,22,23…29 li kama n.p.l. 40. sama li lon tawa nanpa suli.

mani musi

nanpa pona lili en nanpa ona suli pi luka pona li lon la, jan musi li kama sona e ni: jan seme li wile pana e mani musi seme tawa jan pi luka pona?

lipu tu ni li lon tan ni.

lipu #1 li pona tawa ni: jan pi nasin Ton ala li jo e luka pona la, ona li kama jo e mute seme pi mani musi?

lipu #2 li pona tawa ni: jan pi nasin Ton li jo e luka pona la, ona li kama jo e mute seme pi mani musi?

sin la, jan li toki “Lisi”, li weka e mani musi 1000 la, jan pi luka pona li kama jo e ona.

sin la, palisa lukin pi mani musi sin (nimi Nijon: “Onpa” / “Honba”, 本場) li ken lon. ona li lon la:

• jan li kama jo e luka pona tawa jan ante la, palisa wan li toki e ni: o kama jo e mani musi 300 tan jan ni: ona li weka e ijo pona.

• jan li kama jo e luka pona tan sinpin la, palisa wan li toki e ni: o kama jo e mani musi 100 tan jan ale ante.

ijo pona li kama tan weka pi jan ante la, jan mute li ken jo e luka pona tan ona. ni li lon la, jan pi luka pona li kama jo e mani musi tan jan sama. jan ni li kama jo e mani musi pi toki “Lisi”: ona li lon tenpo open #1 kama tawa jan ni: ona li weka e ijo pona.

jan ala li jo e luka pona

sinpin li jo e ala la, jan ala li jo e luka pona la, ni li kama:

• jan ni li open e luka ona: luka ona li jo e kama Tenpa.

jan 1 li jo e kama Tenpa la, ona li kama jo e mani musi 1000 tan jan ante ale.

jan 2 li jo e kama Tenpa la, jan #1 li kama jo e mani musi 1500 jan #1 pi kama Tenpa ala. jan #2 li kama jo e mani musi 1500 tan jan #2 pi kama Tenpa ala.

jan 3 li jo e kama Tenpa la, jan pi kama Tenpa ala li pana e mani musi 3000 tawa jan ale ante. (jan wan ale pi kama Tenpa li kama jo e mani musi 1000.)

jan ala anu jan ale li jo e kama Tenpa la, mani musi li pana ala.

jan pi toki “Lisi” li weka e mani musi 1000 la, mani musi ni li awen. jan pi luka pona li ken kama jo e ona lon tenpo musi kama.

ante pi tenpo musi / palisa lukin pi mani musi sin

jan Ton li jo e luka pona la, tenpo musi li ante ala. o sin e palisa lukin pi mani musi sin.

jan ala li jo e luka pona la, jan Ton li lon kama Tenpa la, tenpo musi li ante ala. o sin e palisa lukin pi mani musi sin.

tenpo musi li pini ike la, tenpo musi li ante ala. o sin e palisa lukin pi mani musi sin.

musi mute la, palisa lukin pi mani musi sin li sama palisa pi mani musi 100. taso, ona li pali ala sama mani musi. ona li kama ala tan mani musi pi jan musi.

musi mute la, jan musi li jo e mani musi ala la, musi li pini.

musi mute la, nasin ante li lon: tenpo tawa pi nanpa pini li pini la, jan ala li jo e mani musi 30000 la, tenpo tawa sin li open.

palisa pi mani musi

musi pi ijo lon la, jan li kepeken e palisa pi mani musi.

kulupu 4 pi palisa pi mani musi li lon:

• palisa pi sitelen 8 pimeja lili. ona li sama mani musi 100.

• palisa pi sitelen wan loje suli. ona li sama mani musi 1000.

• palisa pi sitelen 5 loje lili. ona li sama mani musi 5000.

• palisa pi sitelen mute pi loje en laso. ona li sama mani musi 10000.

pini ike

tenpo musi li ken pini ike lon nasin ni:

• kon wawa 4 sama: tenpo musi li open. jan Ton li weka e ijo musi pi kon wawa. jan Nan en jan Sa en jan Pe li weka e ijo musi pi kon wawa sama.

• ijo suli ante 9: tenpo musi li open. jan li jo e ijo musi 13. jan li kama jo e ijo musi #14 lon tenpo #1. luka ona li jo e ijo suli ante 9. jan li wile e ni la, ona li ken toki e ni, li ken pini ike e tenpo musi.

• toki “Lisi” tan jan 4: jan 3 li toki “Lisi”. jan #4 li toki e “Lisi”, li weka e ijo musi. ona li pona ala tawa luka pi jan ante.

• kulupu suli 4: jan ale li jo e kulupu suli 4. (jan wan li jo e kulupu suli 4, musi li pini ike ala.)

• pona tawa jan 3: jan li weka e ijo musi. ona li pona tawa luka pi jan ante ale.

musi li pini ike la, mani musi li ante ala.

musi pi sitelen tawa

sina wile musi e musi Lisi Masan la, nasin mute li lon. nasin pona li musi kepeken musi pi sitelen tawa. ona li toki e ni tawa sina: sina ken toki e nimi “Si”, “Kan”, “Pon”, “luka mi li pona”, “pona tan ijo sina” lon tenpo seme? luka pona sina li pali e mani musi pi mute seme?

sina ken musi lon poka jan ante kepeken lipu kon MahjongSoul. ona li toki e toki Inli, e toki Sonko pi nasin sitelen pi tenpo pini. ona li pona mute tawa jan sin.

lipu kon Tenhou li pona lili tawa jan sin. jan pi sona mute li musi kepeken ona. ona li ken toki e toki Nijon, e toki Inli, e toki Sonko, e toki Anku/Soson (한국어/조선말), e toki Losi (Русский), e toki Kanse, e toki Italija, e toki Epanja, e toki Wije (Tiếng Việt). taso, sitelen mute li kepeken e toki Nijon taso.

musi pi sitelen tawa “sama akesi seli” (龍が如く / “Yakuza”) li jo e tomo pi musi Lisi Masan lon insa ona. sina ken musi lon poka ilo musi kepeken ona.

sin la, mi pali e ante toki pi musi “musi Masan pi jan musi 4” (“4 Nin Uchi Mahjong”, “４人打ち麻雀”). ante toki ni li toki kepeken toki pona. sina ken kama jo e lipu ante pi ante toki lon lipu ni.

sona sin

nasin nanpa tan musi Lisi Masan

toki Nijon la, nimi nanpa mute li lon. taso, wan ona li kalama sama nimi pi toki pona. musi Lisi Masan la, nimi nanpa li ante, li ken kama pona lon toki pona.

nimi “Jaku” pi “nasin Jaku” li ante tan nimi nanpa “jaku” pi nanpa 100.