nimi pi pu ala

lipu lawa pi toki pona (“pu”) li jo e nimi 120. taso, nimi ante li lon. ona li kama tan ni:

• tan #1 la, nimi li lon tenpo pini, taso ona li lon pu ala.

• tan #2 la, jan li pali e nimi sin lon tenpo ni: pu li pali pini.

jan mute la, nimi ni li pona. jan ante la, nimi ni li ike. lipu ni la, mi wile toki e nimi sin kepeken nimi pu taso.

kin

ijo mute la, nimi “kin” li sama nimi “a”. ona li sama ale lon pu. taso, ona li ante lili.

nimi “kin” li ken toki e ni: ijo tu, anu kama tu, li jo e sama.

anu la, ona li ken suli e wawa nimi. nimi “a” li pali sama, taso jan li kepeken e nimi “a”, e nimi “kin” la, ona li toki e ni: nimi “a” li suli e wawa pilin. nimi “kin” li suli e wawa nimi. kama pi mute lili la, ona li ken sama nimi “mute”.

namako

nimi “namako” li sama nimi “sin” lon pu, taso ona li ante lon tenpo pini ni: nimi ni li tu.

tenpo pini la, nimi “sin” li toki e ni taso: ni li kama tan tenpo pini lili. jan li pali e ni.

nimi “namako” li toki e ni: kulupu ijo wan li lon. jan li ken pana e ijo tawa kulupu ni. ijo ni li ijo namako.

nimi “namako” li nimi ijo la, ona li ken toki e ni: sina pana e ijo ni tawa moku la, pilin moku ona li ante. (sina ken toki e ni kepeken nimi “sin moku”).

oko

nimi “oko” li sama nimi “lukin” lon pu, taso tenpo pini la, ona li jo e kon ante.

tenpo pini la, nimi “lukin” li nimi pali. nimi “oko” li nimi ijo. oko li wan sijelo. jan en soweli lukin kepeken oko ona.

tenpo ni la, nimi “lukin” li nimi pali, li nimi ijo. lukin li wan sijelo. jan en soweli li lukin kepeken lukin ona.

toki insa mi la, ante ni li pona. nimi “kute” li sama nimi “lukin” pi tenpo ni. ona li nimi ijo, li nimi pali. (“jan en soweli li kute kepeken kute ona.”)

apeja

nimi “apeja” li nimi pi tenpo pini. ona li toki e ni:

jan li pali e ijo ike lon tenpo pini. jan sama, anu jan ante, li pilin ike tan ni.

kipisi

nimi “kipisi” li nimi pi tenpo pini. ona li toki e ni:

jan li pali e ni: tenpo pini la, ijo wan li lon. ona li ante e ona tawa ni: ijo tu lili, anu ijo mute lili, li lon.

ijo ni li lon sama soweli la, jan li kipisi e ona la, ona li moli.

nimi pali la, nimi “kipisi” li sama nimi “tu”. taso, sin la, nimi “tu” li nimi ante, li nimi nanpa.

ilo kipisi (nimi ante: “ilo pi tu ijo”) li ilo kiwen ni: palisa tan poka wan tawa poka ante la, ona li sama lipu. palisa tan monsi tawa sinpin la, ona li suli. poka pi sama lipu li tawa lon selo ijo, ona li ken pakala e selo.

leko

nimi “leko” li nimi pi tenpo pini. ona li toki e ni:

ijo li leko la, poka ale ona li sama supa. sitelen la, leko pona li jo e poka 4. poka ale li palisa. poka tu li wan lon ma wan la, ona li lukin sama ni: sitelen “L” pi sitelen Lasina, anu sitelen “pi” pi sitelen pona. poka anpa li sama poka sewi. poka pi poka wan li sama poka pi poka ante.

lon la, leko pona li jo e poka 6. ijo ante li sama. poka sinpin li sama poka monsi.

leko li pona mute la, poka ale li jo e suli sama.

ma Tansi la, kulupu esun Leko (“Lego”) li pali e ijo musi ni: ona li sama leko, taso ijo tu li ante. sewi ona li jo e nena lili. anpa ona li jo e lupa lili. jan li ken wan e ijo musi kepeken nena ni, kepeken lupa ni. jan li ken pali e ijo musi mute kepeken ijo musi ni. ken la, nimi “leko” li kama tan nimi pi kulupu esun.

sin la, nimi “leko” li ken toki e ijo ante.

ken la, jan li tawa tan supa anpa tawa supa sewi, anu tan supa sewi tawa supa anpa, kepeken noka la, ona li wile tawa lon supa lili lon insa nasin ona. supa lili ni li “leko”.

monsuta

nimi “monsuta” li nimi pi tenpo pini. ona li toki e ni:

• ijo #1 la, monsuta li sama soweli. ken la, monsuta li suli mute. ken la, monsuta li wawa mute. jan li lukin e monsuta, anu kute e monsuta la, ona li pilin ike, li pilin e ni: “mi jo e wawa lili”.

• ijo #2 la, monsuta li pilin. jan li pilin ike, li pilin e ni: “mi jo e wawa lili”, li pilin e ni: “lon mi li awen ala”. ona li pilin monsuta. jan li ken pilin monsuta tan ijo mute.

kapesi

nimi “kapesi” li nimi pi tenpo pini. jan pi mute lili lili li toki kepeken ona. ona li toki e ni:

• ijo #1 la, kapesi li kule. kule “kapesi” li jelo pimeja. ma li jo e kasi ala la, ona li kapesi.

• ijo #2 la, kapesi li moku telo. ona li jelo pimeja anu pimeja, li kama tan kiwen lili kasi. jan mute la, ona li moku e ona la, ona li kama jo e wawa ni: ona li ken pali lon tenpo mute.

majuna

nimi “majuna” li nimi pi tenpo pini. jan pi mute lili li toki kepeken ona. ona li toki e ni:

ijo li kama tan tenpo pini suli. jan li majuna la, jan li lon tenpo suli.

pasila

nimi “pasila” li nimi pi tenpo pini. jan pi mute lili lili li toki kepeken ona. ona li toki e ni:

ijo li pasila la, ona li pona insa. ken la, ijo li pali anu pali ala e ijo pona. taso, ijo li jo e ijo lili lon insa ona. jan li ken kama sona e ona lon tenpo lili.

pali li pasila la, jan li ken pali e ona lon tenpo lili, anu kepeken wawa lili.

tenpo ni la, nimi “pasila” li nimi ma. ma suli Amelika la, ma Pasila (Brasil) li lon. ma tomo lawa ona li ma tomo Pasilija (Brasília). ma Pasila li suli #5 lon ma ale, li jo e mute jan suli #6 lon ma ale.

pake

nimi “pake” li nimi pi tenpo pini. ona li toki e ni:

jan li pake e ijo la, jan li pali e ni: ijo li ken ala pali. taso, jan li pakala ala e ona. jan li pini pake e ijo la, ijo li ken pali.

jan li pake e pali la, jan li pali e ni: pali sin li kama ala lon tenpo ni. pali pi tenpo pini li awen.

pata

nimi “pata” li nimi pi tenpo pini. jan pi mute lili lili li toki kepeken ona. ona li toki e ni:

jan li pata pi jan ante la, jan li jan sama ona.

tuli en po

nimi “tuli” en nimi “po” li nimi nanpa pi tenpo pini. jan pi mute lili lili li toki kepeken ona. taso, jan li wile pali e nasin sin pi toki nanpa pi toki pona la, ona li ken toki kepeken ona. ona li toki e ni:

nimi “tuli” li sama nimi “tu wan” (3).

nimi “po” li sama nimi “tu tu” (4).

powe

nimi “powe” li ken toki e ijo ni:

• ijo #1 la, sona li ike. ona li toki e ijo pi lon ala. anu la, ona li toki e ijo lon, taso sona li ante lon.

• ijo #2 la, ijo li sama lukin, li sama kute, li sama pilin, taso ona li ante insa. ken la, ona li ike. taso, kama mute ante la, ona li ken pona. (“len pi selo soweli powe” li kama tan soweli ala. lon soweli li suli tawa sina la, ona li pona tawa sina.)

soko

nimi “soko” li nimi sin.

soko li kili. taso, ona en kili mute li ante. kili mute li wan kasi. soko li wan kasi ala. soko li jo e linja mute lon ma. soko li kama jo e ijo wile kepeken ona. soko li kama ala jo e wawa tan suno.

sona pi ijo lon la, soko en kasi li jo e sama lili. soko en soweli li jo e sama lili.

soto en teje

nimi “soto” en nimi “teje” li nimi sin.

nimi ni li toki e nasin, li toki e poka. ona li lon kulupu sama pi nimi ni: nimi “sewi” en nimi “anpa” en nimi “sinpin” en nimi “monsi”.

“soto” en “teje” li poka ante.

  |<---------------------------------------->|
 soto                                      teje

jan pi mute suli li sitelen kepeken luka teje ona. jan pi mute lili li sitelen kepeken luka soto ona.

sitelen Lasina en sitelen pona la, palisa sitelen li open lon poka soto, li pini lon poka teje. sitelen Alapi (اَلْعَرَبِيَّةُ) en sitelen Iwisi (עִבְרִית) la, palisa sitelen li open lon poka teje, li pini lon poka soto.

tenpo pini la, nimi “teje” li nimi “te”. kon ona li sama.

tonsi

nimi “tonsi” li nimi sin.

jan li mije taso ala, li meli taso ala la, ona li tonsi.

ni li ken: jan li meli, li tonsi. jan li mije, li tonsi. jan li mije, li meli, li tonsi.

anu la, jan li kama lon la, jan li toki e ni: “ona meli/mije”. taso, ona li meli/mije ala. jan ni li tonsi.

kon pi nimi “tonsi” li kiwen ala. o sona e ni: jan li toki e ni: “mi meli” anu “mi mije” anu “mi tonsi” la, o kute e ona. o awen e sona ni. sina toki e ona la, o toki ala e sona ike.

jasima

nimi “jasima” li nimi sin.

sinpin ni li lon: sina lukin e ona la, sina ken lukin e sitelen ni: sina en ma poka sina li lon ona. sina pali e tawa la, sitelen ni li pali e tawa sama. sitelen ni li jasima. sinpin li jasima e sina, e poka sina.

selo telo li sama supa la, telo li ken jasima e sewi.

ma pi mute lili la, jan anu ilo li kalama la, kalama sama li kama lon tenpo kama lili. kalama ni li kalama jasima. ma li jasima e kalama ni.

lanpan

nimi “lanpan” li nimi sin.

jan li lanpan e ijo la, ni li lon: tenpo pini la, ona li jo ala e ijo. tenpo ni la, ona li kama jo e ijo.

ni li ken: tenpo pini la, jan ante li jo e ijo. ona li wile e ni: ona li awen jo e ijo.

linluwi

nimi “linluwi” li nimi sin.

ilo sona mute li ken toki tawa ilo sona ante kepeken linluwi. lipu mute en kalama mute en sitelen tawa mute li lon linluwi. ilo li ken linja tawa linluwi kepeken nasin mute.

ilo sona Pisi (PC) en ilo sona Makintosi (Macintosh) en ilo toki Apon (iPhone) en ilo toki Antowi (Android) en ilo mute ante li ken pali kepeken linluwi.

lipu ni li lon linluwi, li jo e nimi nasin https://devurandom.xyz/tokipona/nimi_pi_pu_ala.html.

misikeke

nimi “misikeke” li nimi pi tenpo pini.

misikeke li ijo pi pona sijelo.

sijelo sina li ike la, ni li ken: sina moku anu kepeken e misikeke. ona li pona e sijelo sina.