musi Soki (Shogi)

lipu ni li pini ala. ona li ken jo e sona ike. ona li ken jo ala e sona suli. / this document is not finished. it can have errors or missing content.

musi Soki (Shogi)

musi Soki li musi supa.

ijo mute la, ona li sama musi pi jan lawa moli. musi Soki en musi pi jan lawa moli li jo e tan sama. ma Insija pi tenpo pini suli la, musi “Satulanka” (Chaturanga) li lon. jan li tawa, ona li tawa e nasin musi, ona li ante e ona.

nasin wan la, musi “Satulanka” li tawa tan ma Insija tawa ma Ilan, tawa ma mute pi nasin sewi Silami, tawa ma Losi, tawa ma Elopa. nasin ona li ante. ona li kama musi pi jan lawa moli.

nasin ante la, ona li tawa ma Tawi, tawa ma Sonko, tawa ma Anku, tawa ma Nijon. nasin ona li ante lon ma ni. taso, nasin musi li awen lon ma ni. musi pi ma Sonko li jo e nimi “Sijansi” (Xiangqi). musi pi ma Nijon li musi Soki (Shogi).

musi Soki li jo e sama mute tawa musi pi jan lawa moli, taso ona li jo e ante mute. ijo musi li ante mute. ma musi li ante mute. ante #1 li ni: jan musi li anpa e ijo musi pi jan musi ante la, ona li kama jo e ona, li ken tawa e ona tawa ma musi.

jan tu li utala kepeken musi ni tawa ni: ona li wile anpa e ijo musi “jan lawa” pi jan ante.

supa musi

supa musi li jo e nasin 9 tan poka tawa poka ante. sin la, ona li jo e nasin poka 9 tan sinpin tawa monsi. nasin tu ni li kama wan la, ma li lon. tan ni, ma 81 li lon.

nimi ma li kama tan nanpa pi nasin poka en nanpa nasin. tan ni, “ma pi nanpa 3 en 7” li ma lon nasin poka nanpa 3, lon nasin nanpa 7.

o lukin noka e sitelen pi musi supa:

               poka pi jan musi walo
         -- +--+--+--+--+--+--+--+--+--+
    nasin ^ |  |  |  |  |  |  |  |  |  | nasin #1
   sinpin | +--+--+--+--+--+--+--+--+--+
          | |  |  |  |  |  |  |  |  |  | nasin #2
    (tawa | +--+--+--+--+--+--+--+--+--+
      jan | |  |  |  |  |  |  |  |  |  | nasin #3
     musi | +--+--+--O--+--+--O--+--+--+
  pimeja) | |  |  |  |  |  |  |  |  |  | ...
          | +--+--+--+--+--+--+--+--+--+
          | |  |  |  |  |  |  |  |  |  |
          | +--+--+--+--+--+--+--+--+--+
          | |  |  |  |  |  |  |  |  |  | ...
          | +--+--+--O--+--+--O--+--+--+
          | |  |  |  |  |  |  |  |  |  | nasin #7
          | +--+--+--+--+--+--+--+--+--+
          | |  |  |  |  |  |  |  |  |  | nasin #8
    nasin | +--+--+--+--+--+--+--+--+--+
    monsi V |  |  |  |  |  |  |  |  |  | nasin #9
         -- +--+--+--+--+--+--+--+--+--+
             ^ poka pi jan musi pimeja^
             |                        |
             |                        |
        nasin poka #9          nasin poka #1

nasin “monsi” li nasin tawa poka pi jan musi sama. nasin “sinpin” li nasin tawa poka pi jan musi ante.

ijo musi en tawa ona

jan wan li kama jan musi pimeja. jan ante li kama jan musi walo.

toki Nijon la, jan musi pimeja li jo e nimi “Sente”. ona li toki e ni: “tenpo tawa open”. jan musi walo li jo e nimi “Kote” (Gote). ona li toki e ni: “tenpo tawa pini”.

           .
  _-^-_   /|\ poka sinpin
 /     \   |
 /     \   |
/       \  |
/_______\  |  poka monsi

ijo musi ale li lukin sama ni. ona li jo e poka sinpin, e poka monsi. poka monsi li sama supa. poka sinpin li sama lukin sewi pi selo tomo. (anu la, ona li sama sewi pi sitelen “tomo” pi sitelen pona.)

jan musi li jo e ijo musi la, sinpin pi ijo musi ona li wile nasin tawa poka pi supa musi pi jan musi ante.

ijo musi ni li jan utala luka tu tu, li soweli tawa tu, li jan utala lawa pi kiwen lili tu, li jan utala lawa pi kiwen suli tu, li tomo kon tu, li ijo pi tawa nasa wan, li tomo tawa wan, li jan lawa wan.

musi open la, tenpo pimeja li lon.

tenpo pimeja la, jan musi pimeja li ken tawa e ijo musi. ona li pini tawa e musi ijo la, tenpo walo li lon.

tenpo walo la, jan musi walo li ken tawa e ijo musi. ona li pini tawa e musi ijo la, tenpo pimeja li lon.

jan musi li ken tawa e ijo musi lon tenpo ona taso.

jan musi li ken tawa e ijo musi ona taso.

jan musi li ken tawa e ijo musi wan taso.

jan musi li ken tawa e ijo musi la, jan musi ken ala tawa ala e ijo musi.

jan musi li ken tawa e ijo musi kepeken nasin pi ijo musi ni taso.

ijo musi li ken ala tawa ma ni: ijo musi ona li lon ona.

ijo musi li ken tawa ma ni: ijo musi pi jan musi ante li lon ona. ona li pali e ni la, jan musi ona li anpa e ijo musi ni. jan musi li tawa e ijo musi ni tawa poki ona, li tawa e ijo musi ona tawa ma pini pi ijo musi pi jan musi ante.

ijo musi ante li lon insa pi nasin ona la, ijo musi “soweli tawa” taso li ken tawa ma ni.

jan musi li kama anpa e ijo musi pi jan musi ante, ona li kama jan musi ona, li tawa poki ona.

jan musi li ken tawa e ijo musi wan ona tan poki ona. ona li pali e ni la, ona li ken ala tawa e ijo musi ante lon tenpo ni.

ijo musi li ken tawa ma, anu ona li ken anpa e ijo musi lon ma, jan li toki e ni: ijo musi li “utala” e ma ni.

ijo musi li ken ala tawa ma tan ni: ijo musi ante pi jan musi sama li lon ma ni la, jan li toki e ni: ijo musi li “awen” e ma ni, e ijo musi ante ni. ijo musi pi jan musi ante li anpa e ijo musi ante la, ijo musi #1 li ken anpa e ijo musi pi jan ante ni.

nasin pi ijo musi

nimi pi ijo musi	nimi lili	nimi pi toki Nijon	sitelen Kansi	sona pi nimi Nijon
jan utala	jan	Ujo (fuhyō)	歩兵　（歩）	jan pi tawa noka
soweli tawa	soweli	Kema (keima)	桂馬　（桂）	soweli tawa pi kasi Kasija
jan utala lawa pi kiwen lili	kiwen lili	Kinso (ginshō)	銀將　（銀）	jan utala lawa pi kiwen ilo walo
jan utala lawa pi kiwen suli	kiwen suli	Kinso (kinshō)	金將　（金）	jan utala lawa pi kiwen ilo jelo
tomo kon	kon	Kosa (kyōsha)	香車　（香）	tomo pi ijo kon pi pilin nena pona
ijo pi tawa nasa	nasa	Kakuko (kakugyō)	角行　（角）	ijo pi tawa pi ante palisa
tomo tawa	tomo	Isa (hisha)	飛車　（飛）	tomo pi tawa sewi
jan lawa (jan pi sona suli)	lawa	Oso (ōshō)	王將　（王）	jan utala lawa pi jan lawa
jan lawa (jan pi sona lili)	lawa	Kokuso (gyokushō)	玉將　（玉）	jan utala lawa pi kiwen kule

o sona e sitelen Kansi pi ijo musi. ijo musi ale li lukin sama mute. ante ona taso li suli ona, li sitelen Kansi ona.

lipu ni li jo e nimi tu tawa jan lawa. kama mute la, jan pi sona mute (jan pi nanpa wawa suli anu jan pi tenpo lon suli) li kama jo e ijo musi pi sitelen “王將” anu sitelen “王”. jan musi ante li kama jo e ijo musi pi sitelen “玉將” anu sitelen “玉”. ijo musi ni li ante lon nimi taso. ona li sama lon ijo ante ale.

jan utala li ken tawa ma sinpin wan.

+---+---+---+
|   | X |   |
+---+---+---+
|   | O |   |
+---+---+---+
|   |   |   |
+---+---+---+

sitelen ni la, jan utala li lon ma pi sitelen “O”. ona li ken tawa ma pi sitelen “X”.

soweli tawa li ken tawa ma tu sinpin en ma wan poka.

ijo musi pi jan musi ante li lon insa nasin pi ma ni, ona li ken tawa ma ni.

+---+---+---+
| X |   | X |
+---+---+---+
|   |   |   |
+---+---+---+
|   | O |   |
+---+---+---+

sitelen ni la, jan utala lon soweli tawa li lon ma pi sitelen “O”. ona li ken tawa ma pi sitelen “X”.

jan utala lawa pi kiwen lili li ken tawa ma ni:

ma sinpin wan
ma poka wan pi ma sinpin wan
ma poka wan pi ma monsi wan

+---+---+---+
| X | X | X |
+---+---+---+
|   | O |   |
+---+---+---+
| X |   | X |
+---+---+---+

sitelen ni la, jan utala lawa pi kiwen lili li lon ma pi sitelen “O”. ona li ken tawa ma pi sitelen “X”.

jan utala lawa pi kiwen suli li ken tawa ma ni:

ma sinpin wan
ma poka wan pi ma sinpin wan
ma poka wan
ma monsi wan

+---+---+---+
| X | X | X |
+---+---+---+
| X | O | X |
+---+---+---+
|   | X |   |
+---+---+---+

sitelen ni la, jan utala lawa pi kiwen suli li lon ma pi sitelen “O”. ona li ken tawa ma pi sitelen “X”.

tomo kon li ken tawa lon nasin ni: o tawa ma sinpin wan. ona li ken tawa ma mute lon nasin ni.

+---+---+---+
|   | X |   |
+---+---+---+
|   | X |   |
+---+---+---+
|   | X |   |
+---+---+---+
|   | X |   |
+---+---+---+
|   | O |   |
+---+---+---+
|   |   |   |
+---+---+---+

sitelen ni la, tomo kon li lon ma pi sitelen “O”. ona li ken tawa ma pi sitelen “X”.

ijo pi tawa nasa li ken tawa lon nasin ni: o tawa ma sinpin wan anu ma monsi wan, o tawa ma poka wan. ona li ken tawa ma mute lon nasin ni.

+---+---+---+---+---+---+---+---+---+
|   | X |   |   |   |   |   |   |   |
+---+---+---+---+---+---+---+---+---+
|   |   | X |   |   |   |   |   | X |
+---+---+---+---+---+---+---+---+---+
|   |   |   | X |   |   |   | X |   |
+---+---+---+---+---+---+---+---+---+
|   |   |   |   | X |   | X |   |   |
+---+---+---+---+---+---+---+---+---+
|   |   |   |   |   | O |   |   |   |
+---+---+---+---+---+---+---+---+---+
|   |   |   |   | X |   | X |   |   |
+---+---+---+---+---+---+---+---+---+
|   |   |   | X |   |   |   | X |   |
+---+---+---+---+---+---+---+---+---+
|   |   | X |   |   |   |   |   | X |
+---+---+---+---+---+---+---+---+---+
|   | X |   |   |   |   |   |   |   |
+---+---+---+---+---+---+---+---+---+

sitelen ni la, soweli suli utala li lon ma pi sitelen “O”. ona li ken tawa ma pi sitelen “X”.

tomo tawa li ken tawa lon nasin ni: o tawa ma sinpin wan anu ma monsi wan anu ma poka wan. ona li ken tawa ma mute lon nasin ni.

ijo musi ante li lon insa pi nasin ona la, ona li ken ala tawa ma ni.

+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
| X | X | X | X | O | X | X | X | X |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+

sitelen ni la, tomo kiwen tawa li lon ma pi sitelen “O”. ona li ken tawa ma pi sitelen “X”.

jan lawa li ken tawa ma wan lon nasin ale.

ijo musi li anpa e jan lawa, jan musi ona li anpa. o awen e jan lawa sina.

+---+---+---+---+---+---+---+---+
|   |   |   |   |   |   |   |   |
+---+---+---+---+---+---+---+---+
|   |   |   |   |   |   |   |   |
+---+---+---+---+---+---+---+---+
|   |   |   |   |   |   |   |   |
+---+---+---+---+---+---+---+---+
|   |   |   | X | X | X |   |   |
+---+---+---+---+---+---+---+---+
|   |   |   | X | O | X |   |   |
+---+---+---+---+---+---+---+---+
|   |   |   | X | X | X |   |   |
+---+---+---+---+---+---+---+---+
|   |   |   |   |   |   |   |   |
+---+---+---+---+---+---+---+---+
|   |   |   |   |   |   |   |   |
+---+---+---+---+---+---+---+---+

sitelen ni la, jan lawa li lon ma pi sitelen “O”. ona li ken tawa ma pi sitelen “X”.

ma open pi ijo musi

  9   8   7   6   5   4   3   2   1 <-- nasin poka (open nanpa)
+---+---+---+---+---+---+---+---+---+
|TK |SU |KL |KS |JL |KS |KL |SU |TK | 1 <-- nasin (pini nanpa)
+---+---+---+---+---+---+---+---+---+
|   |TT |   |   |   |   |   |TN |   | 2
+---+---+---+---+---+---+---+---+---+
|JU |JU |JU |JU |JU |JU |JU |JU |JU | 3
+---+---+---+---+---+---+---+---+---+
|   |   |   |   |   |   |   |   |   | 4
+---+---+---+---+---+---+---+---+---+
|   |   |   |   |   |   |   |   |   | 5
+---+---+---+---+---+---+---+---+---+
|   |   |   |   |   |   |   |   |   | 6 
+---+---+---+---+---+---+---+---+---+
|ju |ju |ju |ju |ju |ju |ju |ju |ju | 7
+---+---+---+---+---+---+---+---+---+
|   |tn |   |   |   |   |   |tt |   | 8
+---+---+---+---+---+---+---+---+---+
|tk |su |kl |ks |jl |ks |kl |su |tk | 9
+---+---+---+---+---+---+---+---+---+

open musi la, ijo musi ale li lon ma open ona.

jan utala pi jan musi walo ale li lon ma 9 pi nasin #3. jan utala pi jan musi pimeja ale li lon ma 9 pi nasin #7.

ijo pi tawa nasa pi jan musi walo li lon ma pi nanpa 8 en 2. ijo pi tawa nasa pi jan musi pimeja li lon ma pi nanpa 2 en 8.

ijo musi ante ale li lon nasin #1 tawa jan musi walo, li lon nasin #9 tawa jan musi pimeja.

tomo kon li lon ma #1 en ma #9.

soweli utala li lon ma #2 en ma #8.

jan utala lawa pi kiwen lili li lon ma #3 en ma #7.

jan utala lawa pi kiwen suli li lon ma #4 en ma #6.

jan lawa li lon ma #5.

nasin pi nanpa 1 en 2 en 3 li “tomo” pi jan musi walo. nasin pi nanpa 7 en 8 en 9 li “tomo” pi jan musi pimeja.

sitelen ale kama la, ijo musi pi jan musi pimeja li sitelen kepeken sitelen lili (abcde…). ijo musi pi jan musi walo li sitelen kepeken sitelen suli (ABCDE…).

kama wawa pi ijo musi

ijo musi mute li ken “kama wawa”.

ijo musi li lon supa musi la, ona li ken kama wawa kepeken nasin ni:

o tawa “tomo” pi jan musi ante
o tawa lon “tomo” pi jan musi ante
o tawa tan “tomo” pi jan musi ante

ijo musi li tawa tan poki la, ona li ken ala kama wawa lon tenpo tawa ni. taso, ona li tawa kepeken nasin pi lipu sewi lon tenpo tawa kama la, ona li ken kama wawa.

ijo musi li ken kama wawa la, ona li ken ante ala. taso, nasin ni li lon, ona li ken ala ante ala:

jan utala anu tomo kon pi jan musi pimeja li lon nasin #1.
jan utala anu tomo kon pi jan musi walo li lon nasin #9.
soweli utala pi jan musi pimeja li lon nasin #1 anu #2.
soweli utala pi jan musi walo li lon nasin #8 anu #9.

kama ni li lon la, ijo musi ni li ante ala, ona li ken ala tawa lon tenpo ale.

jan musi li anpa e ijo musi wawa pi jan musi ante, wawa ona li weka.

jan utala lawa pi kiwen suli en jan lawa li ken ala kama wawa.

ijo musi li kama wawa la, o ante e nasin ona lon nasin ni: poka anpa ona li lon sewi ona. sitelen lon poka anpa li jo e sitelen Kansi pi ijo musi wawa. kama mute la, sitelen ni li loje.

sitelen ni li jo e sitelen tu pi ijo musi Soki wan. sitelen #1 li jo e poka
sewi pi ijo musi "jan utala". sitelen Kansi "歩" pimeja li lon ona. sitelen #2 li jo e
poka anpa ona. sitelen Kansi "と" loje li lon ona.

sitelen ni la, ijo musi “jan utala” li jo e sitelen pi ijo musi “jan utala wawa” lon poka anpa ona.

nasin tawa pi ijo musi wawa

nimi pi ijo musi	nimi lili	nimi pi toki Nijon	sitelen Kansi	sona pi nimi Nijon
jan utala wawa	jan wawa	Tokin	と金　（と）	kama kiwen ilo jelo
soweli wawa	soweli wawa	Nalike (narikei)	成桂　（圭）	kasi Kasija wawa
jan utala lawa pi kiwen wawa	kiwen wawa	Nalikin (narigin)	成銀　（全）	kiwen ilo walo wawa
tomo kon wawa	kon wawa	Naliko (narikyō)	成香　（杏）	kon pi pilin nena pona wawa
soweli seli	seli	Lijuma (ryūma)	龍馬　（馬）	soweli tawa pi akesi seli
akesi seli	akesi	Lijujo (ryūō)	龍王　（龍／竜）	akesi seli lawa

jan utala li kama wawa, ona li kama jan utala wawa.
soweli tawa li kama wawa, ona li kama soweli wawa.
jan utala lawa pi kiwen lili li kama wawa, ona li kama jan utala lawa pi kiwen wawa.
tomo kon li kama wawa, ona li kama tomo kon wawa.

ijo musi wawa ni ale li tawa sama jan utala lawa pi kiwen suli.

ijo pi tawa nasa li kama wawa, ona li kama soweli seli. ona li ken tawa sama ijo pi tawa nasi, li ken tawa ma wan lon nasin ale.

+---+---+---+---+---+---+---+---+---+
|   | X |   |   |   |   |   |   |   |
+---+---+---+---+---+---+---+---+---+
|   |   | X |   |   |   |   |   | X |
+---+---+---+---+---+---+---+---+---+
|   |   |   | X |   |   |   | X |   |
+---+---+---+---+---+---+---+---+---+
|   |   |   |   | X | X | X |   |   |
+---+---+---+---+---+---+---+---+---+
|   |   |   |   | X | O | X |   |   |
+---+---+---+---+---+---+---+---+---+
|   |   |   |   | X | X | X |   |   |
+---+---+---+---+---+---+---+---+---+
|   |   |   | X |   |   |   | X |   |
+---+---+---+---+---+---+---+---+---+
|   |   | X |   |   |   |   |   | X |
+---+---+---+---+---+---+---+---+---+
|   | X |   |   |   |   |   |   |   |
+---+---+---+---+---+---+---+---+---+

sitelen ni la, soweli seli li lon ma pi sitelen “O”. ona li ken tawa ma pi sitelen “X”.

tomo tawa li kama wawa, ona li kama akesi seli. ona li ken tawa sama tomo tawa, li ken tawa ma wan lon nasin ale.

+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   | X | X | X |   |   |   |
+---+---+---+---+---+---+---+---+---+
| X | X | X | X | O | X | X | X | X |
+---+---+---+---+---+---+---+---+---+
|   |   |   | X | X | X |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+
|   |   |   |   | X |   |   |   |   |
+---+---+---+---+---+---+---+---+---+

sitelen ni la, akesi seli li lon ma pi sitelen “O”. ona li ken tawa ma pi sitelen “X”.

tawa tan poki lili

jan musi li anpa e ijo musi pi jan musi ante, ona li tawa poki ona, li kama ijo musi ona.

jan musi li ken tawa e ijo musi tan poki ona tawa supa musi lon tenpo tawa ale ona.

taso, nasin mute li lon:

o tawa ala e ijo musi tawa ma ni: ijo musi ante li lon ma ni.
o tawa ala e ijo musi tawa ma ni: ona li ken ala tawa lon tenpo ale kama.
ijo musi ni li jan utala la, o tawa ala e ijo musi tawa ma ni: jan utala ante pi jan musi sama li lon nasin poka sama. (nasin ni la, jan utala wawa li jan utala ala.)
ijo musi ni li jan utala la, o tawa ala e ijo musi tawa ma ni: jan lawa pi jan musi ante li moli lon tenpo tawa kama wan.

jan lawa li ken moli

ijo musi pi jan musi wan li ken anpa e jan lawa pi jan musi ante lon tenpo musi kama wan, jan lawa ona li “ken moli”.

jan lawa li ken moli la, jan musi li wile pali e tawa, tawa ni: ijo musi ante li ken ala anpa e jan lawa. jan musi li ken ala pali e tawa ante.

jan musi li ken ala pali e ni la, jan lawa ona li moli. jan musi ni li anpa.

jan musi li ken ala tawa e ijo musi ona tawa ni: ijo musi pi jan ante li ken anpa e jan lawa ona.

musi suli la, jan musi li ken tawa e ijo musi kepeken nasin ni. taso, ona li pali e ni, ona li anpa lon tenpo tawa kama wan.

+---+---+---+---+---+---+---+---+---+
|   |   |   |   |   |   |   | KS| JL|
+---+---+---+---+---+---+---+---+---+
|   |   |   |   |   |   |   | JU| JU|
+---+---+---+---+---+---+---+---+---+
|   |   |   |   |   |   |   |   |   |
+---+---+---+---+---+---+---+---+---+
|   |TT |   |   |   |   |   |   |   |
+---+---+---+---+---+---+---+---+---+
|   | 3 |   |   |   |   |   |   |   |
+---+---+---+---+---+---+---+---+---+
|   |2 3|   |   |   |   |   |   |   |
+---+---+---+---+---+---+---+---+---+
|ks |2 3| 1 |   |   |   |   |   |   |
+---+---+---+---+---+---+---+---+---+ poki pi jan musi pimeja
| 1 |jl | 1 |   |   |   |   |   |   | li jo e jan utala wan.
+---+---+---+---+---+---+---+---+---+
| 1 |   | 1 |   |   |   |   |   |   |
+---+---+---+---+---+---+---+---+---+ 
tenpo tawa pi jan pimeja (ijo musi pi sitelen lili) li lon.

sitelen ni la, tomo tawa pi jan walo li ken anpa e jan lawa pimeja lon tenpo tawa kama wan. jan lawa pimeja li “ken moli”. jan musi pimeja li wile tawa ni: jan lawa ona li “ken moli” ala.

ona li ken tawa e jan lawa tawa ma pi sitelen “1”. ona li pali e ni la, ijo musi pi jan walo li ken ala anpa e jan lawa lon ma ni lon tenpo kama wan.

anu la, ona li ken tawa e jan utala pi kiwen suli ona tawa ma pi sitelen “2”. ona li pali e ni la, tomo kiwen tawa pi jan walo li ken ala anpa e jan lawa pi jan pimeja tan ni: ijo musi ante li lon insa nasin ona.

anu la, ona li ken tawa e jan utala tan poki ona tawa ma pi sitelen “3”. ona li pali e ni la, toki kiwen tawa pi jan walo li ken ala anpa e jan lawa pi jan pimeja tan nasin sama.

  9   8   7   6   5   4   3   2   1
+---+---+---+---+---+---+---+---+---+
|   |   |   | TK|   |   |   |   |   | 1
+---+---+---+---+---+---+---+---+---+
|   |   |   | JU|   |   |   |   |   | 2
+---+---+---+---+---+---+---+---+---+
|   |   |   |   |   |   | JU| JU| JU| 3
+---+---+---+---+---+---+---+---+---+
|   |   |   |   |   |   |   |   |   | 4 
+---+---+---+---+---+---+---+---+---+
|   |   |   |   |   |   |   |   |   | 5
+---+---+---+---+---+---+---+---+---+
|   |   |   |   |   |   |   |   |   | 6
+---+---+---+---+---+---+---+---+---+
|ju |ju |ju |ju |tk |   |   |   |   | 7
+---+---+---+---+---+---+---+---+---+     poki pi jan musi pimeja
|   |   |jl |ks |   |   |   |   |   | 8   li jo e jan utala lawa
+---+---+---+---+---+---+---+---+---+     pi kiwen suli wan.
|   |   |   |   |   |   |   |   |   | 9
+---+---+---+---+---+---+---+---+---+
tenpo musi pi jan pimeja (ijo musi pi sitelen lili) li lon.

  9   8   7   6   5   4   3   2   1
+---+---+---+---+---+---+---+---+---+
|   |   |   |   | 2 |JL2| 2 |   |   | 1
+---+---+---+---+---+---+---+---+---+
|   |   |   |   | 2 | 1 | 2 | JU| JU| 2
+---+---+---+---+---+---+---+---+---+
|   |   |   |   |kl | 2 |   |   |   | 3
+---+---+---+---+---+---+---+---+---+
|   |   |   |   |   |   |   |   |   | 4 
+---+---+---+---+---+---+---+---+---+
|   |   |   |   |   |   |   |   |   | 5
+---+---+---+---+---+---+---+---+---+
|   |   |   |   |   |   |   |   |   | 6
+---+---+---+---+---+---+---+---+---+
|ju |ju |ju |ju |   |   |   |   |   | 7
+---+---+---+---+---+---+---+---+---+     poki pi jan musi pimeja
|   |   |jl |ks |   |   |   |   |   | 8   li jo e jan utala lawa
+---+---+---+---+---+---+---+---+---+     pi kiwen suli wan.
|   |   |   |   |   |   |   |   |   | 9
+---+---+---+---+---+---+---+---+---+
tenpo musi pi jan pimeja (ijo musi pi sitelen lili) li lon.

sitelen ni la, jan lawa pi jan walo li ken ala moli. taso, jan musi pimeja li ken pali e tawa ni: jan lawa pi jan walo li ken moli, li ken ala ante e ni. ona li pali e ni la, jan lawa pi jan walo li kama moli. jan musi pimeja li anpa e jan musi walo.

ona li ken tawa e jan utala lawa pi kiwen suli tan poki ona tawa ma pi sitelen “1”. ona li pali e ni, jan utala pi kiwen suli li anpa e ma ale pi sitelen “2”. jan lawa pi jan walo li ken ala tawa ma ni: ijo musi ante li utala ala e ona. ona li ken ala anpa e jan utala lawa pi kiwen suli tan ni: jan utala lawa pi kiwen lili lon ma pi nanpa 5 en 3 li awen e jan utala lawa pi kiwen suli.

ni la, jan lawa pi jan walo li kama moli.

kama ante

kama ni li ken: jan musi li ken ala tawa e ilo musi ona, taso jan lawa ona li ken ala moli. ni li lon la, musi li pini. jan musi ante li anpa e jan ni.
- taso, kama ni li ken lon tenpo pi mute lili tan ni: tenpo pi mute suli la, jan musi li ken tawa e ijo musi tan poki ona.
tenpo musi ale la, jan musi wan li ken toki e ni: “mi anpa.” (toki Nijon: “Makemasita” (makemashita)) ona li toki e ni la, musi li pini. jan musi ante li anpa e ona.
ijo musi ale li lon ma sama, li lon poki pi jan sama, li ken tawa lon nasin sama, lon tenpo tawa tu tu pi jan musi sama, musi li pini. jan ala li anpa.
- taso, jan lawa pi jan wan li ken moli lon tenpo tawa tu tu ni la, jan musi ante li anpa.
musi suli la, nasin ni li lon: jan lawa tu li lon “tomo” pi jan musi ante la, jan musi tu li ken toki e ni: “mi ken ala anpa e jan lawa ante. mi wile nanpa e ijo musi, wile pini e musi.”
- ni li lon la, jan musi li lukin e ma musi, e poki ona. ona li lukin e ijo musi ale ona.
- ijo musi li “ijo pi tawa nasa” anu “tomo tawa” anu “soweli seli” anu “akesi seli” la, ona li kama jo e nanpa pona 5.
- ijo musi li “jan lawa” la, ala li ante.
- ijo musi li ijo musi ante la, ona li kama jo e nanpa pona 1.
- ni li pini la, jan musi wan li jo e mute pi nanpa pona ni la: ona li lili tawa 24, ona li anpa.

suli kiwen pi tenpo tawa

musi mute la, jan musi, anu jan pi lawa musi, li wile e ni: tenpo musi li suli ala. ni li lon la, nasin pi suli kiwen pi tenpo tawa li ken lon.

nasin ni la, jan musi li nanpa e suli tenpo pi tenpo tawa ona kepeken ilo tenpo. mute tenpo lawa tu li lon. tenpo lawa #1 li tenpo lawa pi tawa ale. tenpo lawa #2 li tenpo lawa pi tawa wan (toki Nijon: “Pijojomi” (byōyomi)).

jan musi wan li jo e tenpo lawa tu ona.

open musi la, tenpo lawa #1 taso li pali. jan musi li ken pali e tawa mute lon tenpo ni. tenpo lawa #1 li kama ala la, tenpo lawa #2 li open pali. jan musi li wile pali e tawa wan lon tenpo ni. tawa li pini la, tenpo lawa #2 li ante tawa suli open ona. (jan musi li awen ken pali e tawa mute la, taso tawa wan li wile kepeken e tenpo lili.)

tenpo lawa #2 pi jan lawa li kama ala la, ona li anpa.

o musi kepeken ilo sona

lipu kon “Lishogi” la, jan li ken musi lon poka ilo, lon poka jan ante. ona li ken toki kepeken toki Inli, kepeken toki Nijon.
lipu kon “81dojo” li pali e ijo sama. nasin ona li sama nasin musi pi jan sona pi ma Nijon: sina pali e tawa ike la, sina anpa. lipu ni li ken toki e toki mute.

sona ni li kama tan lipu pi musi Soki pi lipu Wikipesija, tan sitelen tawa pi musi Soki pi jan Itesi (Hidetchi) (toki Inli: https://www.youtube.com/user/HIDETCHI )
kulupu toki pi ilo Siko (toki Inli en toki Nijon): Shogi Hall 将棋会館

lipu sona pona |

musi Soki (Shogi)

musi Soki (Shogi)

supa musi

ijo musi en tawa ona

nasin pi ijo musi

ma open pi ijo musi

kama wawa pi ijo musi

nasin tawa pi ijo musi wawa

tawa tan poki lili

jan lawa li ken moli

kama ante

suli kiwen pi tenpo tawa

o musi kepeken ilo sona